Farhat Shahzad
do jhuki ankhon ka pahuncha jab mire dil ko salam
yuun laga hai dopahar men jaise dar aa.i ho shaam
us ke honTon ka kiya jab zikr mere sher ne
har sama.at ke labon se ja laga labrez jaam
jaise sajde men koi gir kar na uTThe der tak
yuun giri ankhon pe palken sun ke ik kafir ka naam
dukh kisi ka ho use dhaḌkan men apni sinch le
kis ne saunpa hai mire dil ko ye pagal-pan ka kaam
ab to ji men hai ki har dukh par laga.un qahqaha
ho ga.i hain shahr men ansu-bhari ankhen to aam
harf jaise ho ga.e saare munafiq ek dam
kaun se lafzon men samjha.un tumhen dil ka payam
is qadar jaldi bhi kya ‘shahzad’ thi aḳhir bata
kya bigaḌta saath gar tu aur chalta chand gaam
Leave a Reply