qarar-e-gud-shuda mere ḳhuda kab aa.ega
miri duaon men rang-e-dua kab aa.ega
badan se bharne lage hain ham apni ruuh ke ghaav
hamen saliqa-e-daru-dava kab aa.ega
yahin kahin se vo avaz de raha hai magar
navah-e-jan men mira na-ḳhuda kab aa.ega
ghurub hota hua raushni ka sayyara
andhere mausamon men kya pata kab aa.ega
sama.aton ko miri murgh-zar karne ko
ḳhamosh dasht men naḳhl-e-sada kab aa.ega
hazar karvan yuun to hain mere saath magar
jo mere naam hai vo qafila kab aa.ega
fasilen TuuT ga.iin ho ga.e mahal mismar
khanDar men raat ga.e dusra kab aa.ega
Leave a Reply