pur-soz jigar ke naale bhi dil-soz nikalte rahte hain
haan sham.a bhi jalti rahti hai parvane bhi jalte rahte hain
ḳhuddam-e-harim-e-naz jo hain allah re un ki ḳhush-baḳhti
didar bhi hota rahta hai arman bhi nikalte rahte hain
ghurbat men vatan aur ahl-e-vatan ki yaad jab aa jaati hai mujhe
dil hai ki taḌapta rahta hai aur ashk bhi Dhalte rahte hain
ai shaiḳh-o-barahman dekhta huun din raat tumhare murdon ko
ye ḳhaak men milte rahte hain vo aag men jalte rahte hain
a.ina husn-e-sabih bhi kya dekhe ki vo vaqt-e-nazzara
dam bhar nahin jamte shauq-e-nazar ke paanv phisalte rahte hain
ai shaiḳh-e-haram e.ajaz hai ye pur-kaif nigah-e-saqi ka
ba-hosh to girte rahte hain behosh sambhalte rahte hain
aram-o-musibat kya shai hai hota nahin kuchh ehsas unhen
manzil ki jo dhun men hain ‘sabir’ din-rat vo chalte rahte hain
Leave a Reply