dard dab jaa.e kisi taur na aansu aa.e
jazba-e-dil pe bata kis tarah qaabu aa.e
tirgi in ko miTane pe kamar-basta thi
phir bhi jangal men chamakte hue jugnu aa.e
dil ke sahra men bahut tej kulanche bharte
shaam hote hi tiri yadon ke aahu aa.e
tere ehsas men Dubun to mahak jaa.e dimagh
tujh ko sochun to mire jism men ḳhushbu aa.e
ai ḳhuda ḳhair salamat rahe gardan meri
mere kandhe pe phir ik shaḳhs ke baazu aa.e
kuchh to ho aisa mire dost ki ye raat kaTe
chain bimar ke dil ko kisi pahlu aa.e
Leave a Reply