Bahaar-e-Fikr Ke Jalwe Luta diye Humne

Akhtar Ansari

bahar-e-fikr ke jalve luTa diye ham ne

junun-e-ishq ke dariya baha diye ham ne

farogh-e-danish-o-burhan ke sho.ale bhaḌka kar

tavahhumat ke ḳhirman jala diye ham ne

gira ke dark-o-basirat ki bijliyan paiham

ta.assubat ke TukḌe uḌa liye ham ne

bana ke fikr-o-tadabbur ko ḳhadim-e-insan

muqaddarat ke chhakke chhuḌa diye ham ne

shu.ur-e-naqd ki sehat-pasandiyon ki qasam

aqidaton ke parḳhache uḌa diye ham ne

miTa ke tafarqa-e-ḳhas-o-am ki la.anat

huquq-e-ḳhas Thikane laga diye ham ne

fatadgan-e-zamin ka buland kar ke alam

falak-nashinon ke parcham jhuka diye ham ne

nae shu.ur se zehnon men bijliyan bhar diin

nai umangon se dil jagmaga diye ham ne

guman hayat pe hota hai giit ki lai ka

kuchh aise giit jahan ko suna diye ham ne

tilism toḌ ke jhuTi haqiqaton ke tamam

ajaibat ke jaadu jaga diye ham ne

vara-e-charḳh the abad jis qadar firdaus

zamin ki sat.h pe la kar basa diye ham ne

bana ke mehnat-e-insan ko ek qadr-e-buland

zamin pe chand sitare bichha diye ham ne

jala ke azmat-e-adam ki sham-e-derina

charagh dair-o-haram ke bujha diye ham ne

jo dark rakhte hain aḳhtar vo samjhen aur bataen

ye kis sharab ke saghar lundha diye ham ne