Poet
ḳhusha ye zarf ki honTon pe hai tabassum bhi
liye hue hain tah-e-chashm sail-e-qulzum bhi
ye inqalab-e-mohabbat ye ijtinab tira
hai nagavar nigahon ka ik tasadum bhi
usi chaman men hain aise hazar-ha ghunche
nasib ho na saka jin ko ik tabassum bhi
ye kya zarur ki us ne kiya ho yaad magar
kabhi kabhi to maza de gaya tavahhum bhi
hai tarjuman-e-gham-e-dil ḳhamoshi-e-paiham
suna raha huun unhen hal-e-be-takallum bhi
shanavari pe jinhen naaz tha vo Duub ga.e
mire liye to sahara bana talatum bhi
suna rahe ho kise dastan-e-gham aḳhir
‘nasir’ Duub ga.e ab to mah-o-anjum bhi
Leave a Reply