ik sharar-e-girafta-rang huun main
phuul se le ke ta-ba-sang huun main
bad-e-sarsar ki tarah garm-e-inan
sina-e-reg ki umang huun main
zarre zarre ne kar diya hairan
aur hairaniyon pe dang huun main
fat.h bhi ik shikast hi hogi
arzuon se mahv-e-jang huun main
kaise tujh ko baha ke le ja.un
mauj-e-ham-saya-e-nihang huun main
shahar-o-sahra ki kuchh nahin taḳhsis
vus.at-e-dasht-e-jan se tang huun main
kis ne dekha fishar-e-mauja-e-jan
aaj tak ab-e-zer-e-sang huun main
Leave a Reply