dard jab sher meñ Dhal jaate haiñ
lafz mafhūm badal jaate haiñ
ghar meñ aate haiñ bahut raat ga.e
muñh añdhere hī nikal jaate haiñ
sab ko ehsās kahāñ hai ki sabhī
kuchh-na-kuchh roz badal jaate haiñ
vahī dariyā haiñ ki jin ke raste
bahr kī samt nikal jaate haiñ
sirf sahrā hī pe ilzām hai kyuuñ
phuul gulshan meñ bhī jal jaate haiñ
log chalte haiñ ‘munavvar’ kis samt
aur kis samt nikal jaate haiñ