Bharat Bhushan Pant
miri hi baat sunti hai mujhi se baat karti hai
kahan tanha.i ghar ki ab kisi se baat karti hai
hamesha us ki baton men andheron ka vahi rona
ye shab jab bhi diye ki raushni se baat karti hai
main jab mayus ho kar raste men baiTh jaata huun
to har manzil miri avargi se baat karti hai
sukut-e-shab men jab saare musafir so.e hote hain
unhin lamhat men kashti nadi se baat karti hai
kabhi chup chaap tariki ki chadar oḌh leti hai
kabhi vo jhiil shab bhar chandni se baat karti hai
dayar-e-zat men us vaqt jab main bhi nahin hota
koi avaz meri ḳhamushi se baat karti hai
hamesha us ke chehre par ajab sa ḳhauf rahta hai
kabhi jab maut meri zindagi se baat karti hai
Leave a Reply