bazm-e-alam men bahut se ham ne maare hath-paon
teri surat ke na dekhe pyare pyare hath-paon
bahr-e-ulfat men bahut se ham ne maare hath-paon
lag rahe manind-e-khas akhir kinare hath-paon
ashiq mu-e-kamar ki le khabar o be-khabar
suukh kar tinka hue hain us ke saare hath-paon
meri khidmat se nihayat khush hua vo bad-mizaj
vasl ki shab kaam aae apne baare hath-paon
bahr-e-hasti men mila ham ko dur-e-maqsad na haif
mauj ke manind kya kya ham ne maare hath-paon
vaqt-e-zabh bola ye qatil ashiq-e-nad-shad se
tukde kar Daala kabhi tu ne jo maare hath-paon
khel rahta hai tavakkul par miri auqat ka
chalte-phirte hain hamare be-sahare hath-paon
tikhi tikhi un ki chitvan banki banki un ki chaal
bholi bholi un ki surat pyare pyare hath-paon