Zahid Is Rah Na Aa Mast Hain Mai-KHwar Kai

zahid is raah na aa mast hain mai-ḳhvar ka.i

abhi yaan chhin liye jubba-o-dastar ka.i

sang-dil kuun na kisi ki hui afsos ḳhabar

mar ga.e sar kuun paTak kar pas-e-divar ka.i

na-tavan mujh sa bhala kaun hai insaf to kar

chashm-e-fattan ke tire garche hain bimar ka.i

dil ki betabi se aur chashm ki be-ḳhvabi se

nazar aane lage ab ishq ke asar ka.i

juun hi vo hosh-ruba aa ke numudar hua

naqsh-e-divar hue talib-e-didar ka.i

abru-o-chashm-o-nigah-o-mizha har ik ḳhun-ḳhvar

ek dil hai mira tis par hain dil-azar ka.i

ai masiha-e-zaman dekh Tuk aa kar ahval

ki tiri chashm ke yaan marte hain bimar ka.i

khinch mat zor se shane ko tu ai mashshata

dil hain us zulf ke balon men giraftar ka.i

kaf-e-pa hain tire sahra ki nishani ‘bedar’

mar gaya to bhi phaphulon men rahe ḳhaar ka.i