main ne muddat se koi khvab nahin dekha hai
raat khilne ka gulabon se mahak aane ka
os ki bundon men suraj ke sama jaane ka
chand si mitti ke zarron se sada aane ka
shahr se duur kisi gaanv men rah jaane ka
khet khaliyanon men baghon men kahin gaane ka
subah ghar chhodne ka der se ghar aane ka
bahte jharnon ki khanakti hui avazon ka
chahchahati hui chidiyon se ladi shakhon ka
nargisi ankhon men hansti hui nadani ka
muskurate hue chehre ki ghazal khvani ka
tera ho jaane tire pyaar men kho jaane ka
tera kahlane ka tera hi nazar aane ka
main ne muddat se koi khvab nahin dekha hai
haath rakh de miri ankhon pe ki niind aa jaae
Leave a Reply