ai shahr-e-ḳhirad ki taaza hava vahshat ka koi in.aam chale
kuchh harf-e-malamat aur chalen kuchh vird-e-zaban dushnam chale
ik garmi-e-jast-e-farasat hai ik vahshat-e-pa-e-mohabbat hai
jis paanv ki taqat ji men ho vo saath mire do-gam chale
aaise gham-e-tufan men akasr ik zid ko ik zid kaaT ga.i
shayad ki nahang-asar hava kuchh ab ke harif-e-dam chale
jo baat sukut-e-lab tak hai us se na ulajh ai jazba-e-dil
kuchh arz-e-hunar ki laag rahe kuchh mere junun ka kaam chale
ai vadi-e-gham ye mauj-e-hava ik saz-e-rah-e-saparan hai
rukti hui rau ḳhvabon ki koi ya sub.h chale ya shaam chale
tujh ko to havaon ki zad men kuchh raat ga.e tak jalna hai
ik ham ki tire jalte jalte basti se charagh-e-sham chale
jo naqsh-e-kitab-e-shatir hai us chaal se aḳhir kya chaliye
khele to zara dushvar chale haare bhi to kuchh din naam chale
kya naam bata.en ham us ka namon ki bahut rusva.i hai
kuchh ab ke bahar-e-taza-nafas ik daur-e-vafa be-nam chale
ye aap kahan ‘madni’-sahib kuchh ḳhair to hai mai-ḳhana hai
kya koi kitab-e-mai dekhi do ek to daur-e-jam chale
Leave a Reply