maana ki mere zarf se baḌh kar mujhe na do
shabnam hi mangta huun samundar mujhe na do
jis ko hava ke ruḳh pe na khola gaya kabhi
ik aise badban ka muqaddar mujhe na do
divar jis ki sarhad sahra se ja mile
aisi saza-e-ḳhana-e-be-dar mujhe na do
lau de rahi hai soch ke vaqfa ki ḳhamushi
har baat ka javab sambhal kar mujhe na do
kuchh de sako agar to koi ḳhvab saunp do
saaya talash karta huun paikar mujhe na do
main aap apne jurm-o-saza ka harif huun
ilzam-e-shauq sab ke barabar mujhe na do
gar sun sako to ‘shaz’ ki ḳhamoshiyan suno
taklif-e-arz-e-hal mukarrar mujhe na do
Leave a Reply