Bedam Shah Warsi

Na Mehrab-e-Haram Samjhe Na Jaane Taq-e-But-Khana

na mehrab-e-haram samjhe na jaane taq-e-but-khana

jahan dekhi tajalli ho gaya qurban parvana

dil-e-azad ko vahshat ne bakhsha hai vo kashana

ki ik dar janib-e-kaaba hai ik dar su-e-but-khana

bina-e-mai-kada Daali jo tu ne pir-e-mai-khana

to kaaba hi raha kaaba na phir but-khana but-khana

kahan ka tuur mushtaq-e-laqa vo aankh paida kar

ki zarra zarra hai nazzara-gah-e-husn-e-janana

khuda puuri kare ye hasrat-e-didar ki hasrat

ki dekhun aur tire jalvon ko dekhun be-hijabana

shikast-e-tauba ki taqrib men jhuk jhuk ke milti hain

kabhi paimana shisha se kabhi shishe se paimana

saja kar lakht-e-dil se kashti-e-chashm-e-tamanna ko

chala huun bargah-e-ishq men le kar ye nazrana

kabhi jo parda-e-be-surati men jalva-farma the

unhin ko alam-e-surat men dekha be-hijabana

miri duniya badal di jumbish-e-abru-e-janan ne

ki apna hi raha apna na ab begana na begana

jala kar shama parvane ko saari umr roti hai

aur apni jaan de kar chain se sota hai parvana

kisi ki mahfil-e-ishrat men paiham daur chalte hain

kisi ki umr ka labrez hone ko hai paimana

hamari zindagi to mukhtasar si ik kahani thi

bhala ho maut ka jis ne bana rakkha hai afsana

ye lafz-e-salik-o-majzub ki hai sharh ai ‘bedam’

ki ik hoshyar-e-khatm-ul-mursalin aur ek divana

More Poems

Leave a Comment