Hasan Naim
ankhon men bas raha hai ada ke baghair bhi
dil us ko sun raha hai sada ke baghair bhi
khilte hain chand phuul bayaban men be-sabab
girte hain kuchh daraḳht hava ke baghair bhi
main huun vo shah-baḳht ki darbar-e-husn men
chalta hai apna kaam vafa ke baghair bhi
munsif ko sab ḳhabar hai magar bolta nahin
mujh par hua jo zulm saza ke baghair bhi
bandon ne jab se kaam sambhala hai dahr ka
nazil hai roz qahr ḳhuda ke baghair bhi
urdu ghazal ke dam se vo tahzib bach ga.i
miTne ka jis ke gul tha fana ke baghair bhi
Leave a Reply