Sheikh Ibrahim Zauq
dil bache kyunkar buton ki chashm-e-shokh-o-shang se
apna ghar to sujhta hai saikdon farsang se
ek bhi nikle na meri si fughan-e-dil-kharash
garche khuun tapke gulu-e-murgh-e-khush-ahang se
chhup ke baithega kahan tu ham se ai rangin-nava
hoga tu jis rang men mil jaenge us rang se
bal be-bariki ki goya har tira tar-e-sukhan
jantari men khinch ke nikla hai dahan-e-tang se
ai taghaful-kesh jaldi aa ki tu vaqif nahin
is dil-e-betab o jan-e-muztarib ke dhang se
josh-e-girya se rahi barsat barson par kabhi
us ki tegh-e-tez aluda na dekhi zang se
mere girye ke asar se ho gae patthar bhi aab
jhadte hain ja-e-sharar paani ke qatre sang se
pahle ye niyat vazu ki hai namaz-e-ishq men
dil se kah diije ki dhove haath naam o nang se
‘zauq’ zeba hai jo ho rish-e-safed-e-shaikh par
vasma ab-e-bang se mehndi mai-e-gul-rang se
Leave a Reply