Ajmal Ajmali
shahr shahr dhund aae dar-ba-dar pukar aae
sina-chak nikle the aur dil-figar aae
ham ki the tahi-daman dost aur kya karte
zindagi si dilkash shai tere gham men haar aae
tere dar se gham le kar jab gunahgar uThe
mai-kadon ka kya kahna masjiden sanvar aae
laghzishon se vabasta laghzishen qayamat ki
raat kuchh ajab dhun men tere bada-ḳhvar aae
dosto bas is lamha ham ko yaad kar lena
jab kabhi gulistan men mausam-e-bahar aae
Leave a Reply