Tumhaare Sine Mein Dil Ke Jaisa Jo Ek Patthar dhaDak Raha Hai

tumhāre siine meñ dil ke jaisā jo ek patthar dhaḌak rahā hai

vo ek patthar na jaane kitne diloñ kā markaz banā huā hai

ye chāñd se bhī hasīn-tar hai jo chāñd jaisā chamak rahā hai

firāq kī shab meñ āsmāñ par tumhārā chehrā Tañgā huā hai

dil-e-shikasta ke hausloñ ne har ek manzil ko sar kiyā hai

tumhāre dar tak bhī aan pahuñche par is se aage bhī rāsta hai

saḌak pe baiThe hue qalandar ke sar paḌe haiñ savāl kitne

zamāna us se jo pūchhtā hai vo us ne mujh ko batā diyā hai

tumhārī mahfil meñ aane vaale unhī mohabbat ke dushmanoñ ne

tumhārā merā jo vāqi.a thā use fasāna banā rakhā hai

ḳhulūs-e-yārāñ kī qadr lekin ḳhulūs-e-yārāñ kā fā.eda kyā

maiñ in dilāsoñ kā kyā karūñgā ki dard merā bahut baḌā hai

tumhārī yādoñ ke chaḌhte dariyā ko ḳhushk-sālī se kyā ta.alluq

tumhārī yādoñ kā chaḌhtā dariyā har ek mausam meñ bah rahā hai

Leave a Comment