Yusuf Zafar
ai be-ḳhabari ji ka ye kya haal hai kal se
rone men maza hai na bahalta hai ghazal se
is shahr ki divaron men hai qaid mira gham
ye dasht ki pahna.i men hain yadon ke jalse
baton se siva hoti hai kuchh vahshat-e-dil aur
ahbab pareshan hain mire tarz-e-amal se
tanha.i ki ye shaam udasi men Dhali hai
uThta hai dhuan phir mire ḳhvabon ke mahal se
raton ki hai taqdir tira chand sa chehra
nazron men hai tasvir tire nain kanval se
Leave a Reply