Jan Kashmiri
mohabbaton ke pale kaise nafraton men Dhale
ye soch soch ke ham shahr tera chhoḌ chale
isi ḳhayal se karta nahin par-afshani
mire paron ki ragaḌ se kahin falak na jale
ye kah rahi thi hasina tamash-binon se
jo aap log hain achchhe to ham bure hi bhale
hayat o maut kahani hai sa.ebanon ki
kabhi falak ke tale ham kabhi zamin ke tale
tire firaq ke sadme qubul hain lekin
jafa ke ba.ad chale to vafa ka daur chale
ye janashin-e-qamar meri dastaras men nahin
diye ki mauj hai bujh kar jale jale na jale
ajab tariq se utra visal ka lamha
paḌe hain jaan ke laale laga ke us ko gale
Leave a Reply