Shafqat Tanveer Mirza
hamare paas tha jo kuchh luTa ke baiTh rahe
dayar-e-dil men qayamat uTha ke baiTh rahe
vahan jahan par andheron ka karvan utra
kisi umiid pe sham.en jala ke baiTh rahe
tumhare hijr men jo kuchh guzar ga.i guzri
tumhare vasl men ham ghar jala ke baiTh rahe
kahan ke dar-o-rasan aur kya shahid-e-vafa
ye karobar bhi kal phir uTha ke baiTh rahe
ḳhabar na thi ki zaman-ashkar the jo kabhi
vo parda-dar to chalan gira ke baiTh rahe
kaḌakti dhuup men dasht-e-safar se ghabra kar
fasil-e-shahr ke saa.e men aa ke baiTh rahe
zamana kuchh to kahe un se jo ba-hila-e-dil
kisi ki bazm se ham ko uTha ke baiTh rahe
giri hai ghar ki kaḌi par kaḌi to ghar vaale
ghubar-e-sharm men chehre chhupa ke baiTh rahe
vo tifl-e-maktab-e-rasm-e-vafa hamin to na the
jo apni yadon ka mela laga ke baiTh rahe
hai bazgasht hi shayad miri fughan ka javab
”ḳhuda” to apni hi qabron pe ja ke baiTh rahe
vo na-ḳhuda the zamane men mo’atabar jo sada
samundaron men safine baha ke baiTh rahe
Leave a Reply