Mata-E-Harf Bhi KHushbu Ke Ma-Siwa Kya Hai

matā-e-harf bhī ḳhushbū ke mā-sivā kyā hai

havā ke ruḳh pe na jā.ūñ to rāstā kyā hai

maiñ zard biij huuñ aur sabz honā chāhtā huuñ

mirī zamīñ tirī miTTī kā mashvara kyā hai

ye merī kāġhzī kashtī hai aur ye maiñ huuñ

ḳhabar nahīñ ki samundar kā faisla kyā hai

bikhar rahā huuñ tirī tarah maiñ bhī ai zar-e-gul

so tujh se pūchhtā huuñ terā tajraba kyā hai

Leave a Comment