dil-e-divana arz-e-hal par maa.il to kya hoga
magar vo puchh baiThe ḳhud hi hal-e-dil to kya hoga
hamara kya hamen to Dubna hai Duub ja.enge
magar tufan ja pahuncha lab-e-sahil to kya hoga
sharab-e-nab hi se hosh uḌ jaate hain insan ke
tira kaif-e-nazar bhi ho gaya shamil to kya hoga
ḳhirad ki rahbari ne to hamen ye din dikha.e hain
junun ho ja.ega jab rahbar-e-manzil to kya hoga
koi puchhe to sahil par bharosa karne valon se
agar tufan ki zad men aa gaya sahil to kya hoga
ḳhud us ki zindagi ab us se barham hoti jaati hai
unhen hoga bhi pas-e-ḳhatir-e-‘qabil’ to kya hoga
Leave a Reply