Lahu Mein Rang Lahrane Lage Hain

lahū meñ rañg lahrāne lage haiñ

zamāne ḳhud ko dohrāne lage haiñ

paroñ meñ le ke be-hāsil uḌāneñ

parinde lauT kar aane lage haiñ

kahāñ hai qāfila bād-e-sabā kā

diloñ ke phuul murjhāne lage haiñ

khule jo ham-nashīnoñ ke garebāñ

ḳhud apne zaḳhm afsāne lage haiñ

kuchh aisā dard thā bāñg-e-jaras meñ

safar se qabl pachhtāne lage haiñ

kuchh aisī be-yaqīnī thī fazā meñ

jo apne the vo begāne lage haiñ

havā kā rañg niilā ho rahā hai

chaman meñ saañp lahrāne lage haiñ

falak ke khet meñ khilte sitāre

zamīñ par aag barsāne lage haiñ

lab-e-zanjīr hai ta.abīr jin kī

vo sapne phir nazar aane lage haiñ

khulā hai raat kā tārīk jañgal

aur andhe raah dikhlāne lage haiñ

chaman kī baaḌ thī jin kā Thikāna

dil shabnam ko dhaḌkāne lage haiñ

bachāne aa.e the dīvār lekin

imārat hī ko ab Dhāne lage haiñ

ḳhudā kā ghar tumhīñ samjho to samjho

hameñ to ye sanam-ḳhāne lage haiñ

Leave a Comment