Amjad Islam Amjad
lahu men rang lahrane lage hain
zamane ḳhud ko dohrane lage hain
paron men le ke be-hasil uḌanen
parinde lauT kar aane lage hain
kahan hai qafila bad-e-saba ka
dilon ke phuul murjhane lage hain
khule jo ham-nashinon ke gareban
ḳhud apne zaḳhm afsane lage hain
kuchh aisa dard tha bang-e-jaras men
safar se qabl pachhtane lage hain
kuchh aisi be-yaqini thi faza men
jo apne the vo begane lage hain
hava ka rang niila ho raha hai
chaman men saanp lahrane lage hain
falak ke khet men khilte sitare
zamin par aag barsane lage hain
lab-e-zanjir hai ta.abir jin ki
vo sapne phir nazar aane lage hain
khula hai raat ka tarik jangal
aur andhe raah dikhlane lage hain
chaman ki baaḌ thi jin ka Thikana
dil shabnam ko dhaḌkane lage hain
bachane aa.e the divar lekin
imarat hi ko ab Dhane lage hain
ḳhuda ka ghar tumhin samjho to samjho
hamen to ye sanam-ḳhane lage hain
Leave a Reply