Bas Ai Falak Nashat-E-Dil Ka Intiqam Ho Chuka

Saqib Lakhnavi

bas ai falak nashat-e-dil ka intiqam ho chuka

hansa tha jis qadar kabhi ziyada us se ro chuka

na zikr-e-imbisat kar ki daur-e-aish ho chuka

ḳhushi ki fikr kis liye vo dil kahan jo kho chuka

ye ḳhanda-e-tarab-numa mubarak ahl-e-dahr ko

bahut zamana ho gaya ki main hansi ko ro chuka

vafa jo zindagi men thi vahi hai bad-e-marg bhi

ye imtihan rah gaya vo imtihan ho chuka

na dam le ai sarishk-e-gham tujhe qasam hai ishq ki

falak ko chhoḌta hai kyuun agar mujhe Dubo chuka

rahe vo dil men muddaton magar sambhal saka na main

mizaj-e-husn-o-ishq ko bahut dinon samo chuka

ye ashiyana-e-sitam chaman men ho to ḳhuub hai

ye ji men hai ki le uḌuun qafas tu mera ho chuka

ḳhabar nahin ye jagna hai ziist tak ki baad bhi

jo saath dil raha yahi to main lahad men so chuka

nikal ke rah-e-ishq se kisi taraf chalun to kya

kahan se la.un jaan o dil ye de chuka vo kho chuka

ye tu nahin ki vada-e-vafa ko raundta phire

ye main huun sarfarosh-e-dil jo kah diya vo ho chuka

ye ‘saqib’ ek silk hai ḳhazana-ha-e-raz ki

guhar vo shahvar hain jinhen main yuun piro chuka