Sardar Panchhi
tumhare jism ko chhu kar mahak uTThi saba koi
chala ḳhushbu se ḳhushbu ka barabar silsila koi
bahut mayus lauTi hai chaman se phir hava koi
ghazal ke kahne vaale kah rahe hain marsiya koi
ḳhizan ke daur men gulshan ko kya mahsus hota hai
ye nazuk baat samjhega bhi kaise bevafa koi
ye ham janen hamari naav jaane ya bhanvar jaane
hamari kashmakash men ab na aa.e na-ḳhuda koi
hamin ne jaan di jis bankpan se jis qarine se
ye hasrat rah ga.i maqtal men aa kar dekhta koi
sun ai patjhaḌ zamana lag gaya teri hukumat ka
gulon ko ab nahin manzur tera faisla koi
na jaane kyuun dhuen ki ik lakir uThti hai is ghar se
kahin malbe ke niche dab gaya jalta diya koi
abhi tak is zamin ke aadhe sar men dard baaqi hai
are charagaro chhoḌo dua kar lo dava koi
tumhari justuju men chhoḌ di thi ham ne jannat bhi
vagarna is zamin par kaise hota hadisa koi
iradon men zara bijli jaga ke dekh ai ‘panchhi’
isi pinjre se niklega chaman ka rasta koi
Leave a Reply