Salman Akhtar
vo paas rah ke bhi mujh men sama nahin sakta
vo muddaton na mile duur ja nahin sakta
vo ek yaad jo dil se miTi nahin ab tak
vo ek naam jo honTon pe aa nahin sakta
vo ik hansi jo khanakti hai ab bhi kanon men
vo ik latifa jo ab yaad aa nahin sakta
vo ek ḳhvab jo phir lauT kar nahin aaya
vo ik ḳhayal jise main bhula nahin sakta
vo ek sher jo main ne kaha nahin ab tak
vo ek raaz jise main chhupa nahin sakta
Leave a Reply