main ne usi se haath milaya tha aur bas
vo shaḳhs jo azal se paraya tha aur bas
lamba safar tha abla-pa.i thi dhuup thi
main tha tumhari yaad ka saaya tha aur bas
hadd-e-nigah char-su kirnon ka raqs tha
pahlu men chand jhiil ke aaya tha aur bas
ik bheḌiya tha dosti ki khaal men chhupa
is ne mire vajud ko khaya tha aur bas
phir yuun hua hava.en thiin raqsan tamam-rat
ik taqche men diip jalaya tha aur bas
donon taraf ki ranjishen ashkon men bah ga.iin
ik shaḳhs mere ḳhvab men aaya tha aur bas
is karzar-e-zist men ham ne tamam-umr
‘arshad’ kisi ka ishq kamaya tha aur bas
Leave a Reply