sach ko kahne ka hausla hai mujhe
apne anjam ka pata hai mujhe
niind se ḳhvab ho ga.e ruḳhsat
zindagi jaise ik saza hai mujhe
us ne raghbat se haath khinch liya
ab kahan koi sochta hai mujhe
dosti ka bharam hi toḌ diya
in dinon jaane kya hua hai mujhe
jis ki nindon men ḳhvab mere the
jab se jaaga hai DhunDhta hai mujhe
chand jalte saval bujhta dil
zindagi tu ne kya diya hai mujhe
saare rishte jab us ne toḌ liye
muḌ ke ab kya pukarta hai mujhe
ab huun bujhte diye sa suraj tha
in havalon ko sochna hai mujhe
kyuun ‘tapish’ uljhanon men uljha hai
is ke baare men janna hai mujhe
Leave a Reply