Rind Mansub Bahar-Kaif Raha Jam Ke Sath

riñd mansūb bahar-kaif rahā jaam ke saath

zikr aa jaatā hai apnā bhī tire naam ke saath

dil ne ehsās-e-tabāhī ko panapne na diyā

jaam gardish meñ rahā gardish-e-ayyām ke saath

zindagī ko kabhī tartīb mayassar na huī

ruḳh badalte rahe hālāt har ik gaam ke saath

aap to aap zamāna hai gurezāñ ham se

kaun rakhtā hai ta.alluq kisī badnām ke saath

hosh ko fursat-e-ehsās kahāñ baaqī thī

aañkh chaltī rahī saaqī kī har ik jaam ke saath

mashġhala koī nahīñ bāda-gusārī ke baġhair

aisā mānūs huā dil nigah-o-jām ke saath

shāmil-e-hāl rahīñ un kī jafā.eñ ‘maz.har’

zindagī varna guzartī mirī ārām ke saath

Leave a Comment