Aslam Mahmood
bujh ga.e manzar ufuq par har nishan maddham hua
lamha lamha saara rang-e-asman maddham hua
thak ga.e ham-rah mere jagne vaale sabhi
aḳhir-e-shab mujh men bhi ik shor-e-fughan maddham hua
mahv ho ja.unga main bhi ek din har zehn se
a.inon men jaise aks-e-raftagan maddham hua
raat Dhalte Dhalte aa.i sub.h ki dahliz tak
dil ne lai tabdil kar di saz-e-jan maddham hua
hasil o darkar ki har fikr zaa.il ho ga.i
ik nazar uTThi har ik rang-e-ziyan maddham hua
ab kahan vo sahra-zad o pasdaran-e-junun
sahra sahra vahshaton ka har nishan maddham hua
harf-e-dil-dari nahin rasm-e-dil-azari nahin
lahja-e-har-mehrban na-mehrban maddham hua
ik charagh ik aa.ina meri mata-e-be-baha
rah gaya harf-e-yaqin naqsh-e-guman maddham hua
har nishan-e-bam-dar jab miT gaya ‘aslam’ to kya
zor-e-tufan tham gaya ab-e-ravan maddham hua
Leave a Reply