javanon men mohabbat nim-jan ma.alum hoti hai
baḌe buḌhon men lekin naujavan ma.alum hoti hai
Thikane ka koi fiqra ye farmati nahin varna
tiri maan to baḌi ma.aqul maan ma.alum hoti hai
diya hai haq ne meri saas ko kya phuul sa chehra
baroz-e-eid bhi ye nauha-ḳhvan ma.alum hoti hai
mire mahbub tere husn ka ye ik karishma hai
hamari muflisi ab javedan ma.alum hoti hai
alif ne be ke gham men zahr kha kar ḳhud-kushi kar li
baḌi soch aur purani dastan ma.alum hoti hai
kinara meri kashti ke muqaddar men nahin shayad
nahusat naḳhuda ki be-karan ma.alum hoti hai
janab-e-shaiḳh us se roz hi be-nuqta sunte hain
ye shaiḳhani koi ahl-e-zaban ma.alum hoti hai
qutub-minar se gir kar mara to doctor bole
ki is ki maut ham ko na-gahan ma.alum hoti hai
bala se ye ghasiTi ja rahi hain rah-e-ulfat men
tari zulfon ki lamba.i kahan ma.alum hoti hai
bichare rail ke engine ne bhi kanon main ungli di
gham-e-janan ke maron ki fughan ma.alum hoti hai
bayan kya ho nazakat vo to vo nazuk-badan nikla
giran jis ki sama.at ko azaan ma.alum hoti hai
Leave a Reply