Farrukh Jafari
tha abas ḳhauf ki aseb-e-guman main hi tha
mujh men saaya sa koi aur kahan main hi tha
sab ne dekha tha kuchh uThta hua mere ghar se
phailta aur bikharta vo dhuan main hi tha
sach tha vo zahr gavara hi kisi ko na hua
talḳhi-e-za.iqa-e-kam-o-ziyan main hi tha
ḳhud hi pyasa tha bhala pyaas bujhata kis ki
sar pe suraj ko liye abr-e-ravan main hi tha
dar pe ik qufl-e-pur-asrar paḌa tha ‘farruḳh’
bhed khulta bhi to kaise ki makan main hi tha
Leave a Reply