jab raqibon ka sitam yaad aaya
kuchh tumhara bhi karam yaad aaya
kab hamen hajat-e-parhez padi
gham na khaya tha ki sam yaad aaya
na likha khat ki khat-e-peshani
mujh ko hangam-e-raqam yaad aaya
shola-e-zakhm se ai said-fagan
dagh-e-ahu-e-haram yaad aaya
thahre kya dil ki tiri shokhi se
iztirab-e-pa-e-ham yaad aaya
khubi-e-bakht ki paiman-e-adu
us ko hangam-e-qasam yaad aaya
khul gai ghair se ulfat us ki
jam-e-mai se mujhe jam yaad aaya
vo mira dil hai ki khud-binon ko
dekh kar aaina kam yaad aaya
kis liye lutf ki baten hain phir
kya koi aur sitam yaad aaya
aise khud-rafta ho ai ‘shefta’ kyuun
kahin us shokh ka ram yaad aaya
Leave a Reply