aansu ki tarah ponchh ke phenka gaya huun main
taara huun aur zamin pe giraya gaya huun main
qurban-gah-e-gham pe chaḌhane ke vaste
bachpan men kitne pyaar se paala gaya huun main
tabish-gureziyon ko majal-e-nazar kahan
chashma laga ke dhuup ka dekha gaya huun main
go ma-vara-e-vaqt bhi hai mujh men ek chiiz
mizan-e-sub.h-o-sham men taula gaya huun main
dam le ke lauT ja.unga o mezban zamin
qasid bana ke duur se bheja gaya huun main
ai sakinan-e-shahr-e-ḳhamoshan-e-zindagi
paigham-e-hashr de ke utara gaya huun main
manzil ki qadr hoti hai avargi ke ba.ad
jannat se is liye bhi nikala gaya huun main
‘kausar’ libas-e-qahr men utri hain rahmaten
Thokar laga ke raah pe laaya gaya huun main
Leave a Reply