Poet
kya kya na tere sadme se bad-e-khizan gira
gul barg sarv fakhta ka ashiyan gira
likhne lagi qaza jo hamari fatadgi
sau baar haath se qalam-e-do-zaban gira
jab pahunche ham kinara-e-maqsud ke qarib
tab nakhuda jahan se utha badban gira
mubaf-e-surkh choti se kya un ki khul pada
ek saiqa sa dil pe mire na-gahan gira
ta asman pahunch ke hui aah sar-nigun
ya rab ho khair fauj-e-alam ka nishan gira
uth kar chala jo paas se un ke to ghar talak
har har qadam pe zof se main na-tavan gira
dekha jo dasht-e-najd men hal-e-tabah-e-qais
mahmil se laila kuud padi sar-ban gira
dozakh pe kyuun na ho dil-e-‘bimar’ tana-zan
atish se ishq ki hai patinga yahan gira
Leave a Reply