Ahmad Hamdani
dilon ko ranj ye kaisa hai ye khushi kya hai
ye zulmaton se ujalon ki hamdami kya hai
havaen shahar se roti hui guzarti hain
dilon men khauf ki ye ek lahr si kya hai
udasiyon ki ye parchhaiyan si duur talak
mah-o-nujum ki ankhon men ye nami kya hai
ye khilkhilate dar-o-bam men ghutan kaisi
ye jagmagate makanon men tirgi kya hai
bhare jahan men ban-bas ki ye kaifiyyat
har ek samt na jaane ye guunj si kya hai
tire khayal men katti hai umr phir bhi ham
ye sochte hain ki apni bhi zindagi kya hai
tamazaton men bas ik khushk ped ki chhanv
hai jis pe naaz bahut vo bhi agahi kya hai
ye ashk ashk se khvabon men raunaqen kaisi
ye daagh daagh tamanna men tazgi kya hai
mile hain dukh to hamen roz hi tire dar se
magar ye aaj dukhon men nai khushi kya hai
Leave a Reply