Mere Bare Mein Kuchh Socho Mujhe Nind Aa Rahi Hai

mire baare meñ kuchh socho mujhe niiñd aa rahī hai

mujhe zaa.e.a na hone do mujhe niiñd aa rahī hai

mire andar ke dukh chehre se zāhir ho rahe haiñ

mirī tasvīr mat khīñcho mujhe niiñd aa rahī hai

to kyā saare gile-shikve abhī kar loge mujh se

kuchh ab kal ke liye rakkho mujhe niiñd aa rahī hai

sahar hogī to dekheñge ki haiñ kyā kyā masā.il

zarā sī der sone do mujhe niiñd aa rahī hai

tumhārā kaam hai saarī hiseñ bedār rakhnā

mire shāne pe sar rakkho mujhe niiñd aa rahī hai

bahut kuchh tum se kahnā thā magar maiñ kah na paayā

lo merī Diary rakh lo mujhe niiñd aa rahī hai

Leave a Comment