Najma Shaheen Khosa
mujhe jab bhi vo galiyan aur vo rasta yaad aata hai
koi dhundla sa manzar hai jo ujla yaad aata hai
faza-e-dil pe taari hai bahut hi habs ka mausam
tiri qurbat ki ḳhushbu ka vo jhonka yaad aata hai
kaha tum to juda.i ka vo manzar bhuul baiThe ho
ḳhala men dekh kar mujh se vo bola yaad aata hai
ḳhizan-rut hai magar mujh ko ḳhayalon ke tasalsul men
mohabbat ke gulabon ka vo sapna yaad aata hai
kisi ke dukh bhare lamhe men jab koi bilakta hai
haqiqat men use har zaḳhm apna yaad aata hai
musalsal ret par chalna vafa ki riit Thahri hai
tiri dahliz tak phaila vo sahra yaad aata hai
vo lamha jo guzarte mausamon men saath Thahra hai
mujhe ḳhud bhi nahin ma.alum kitna yaad aata hai
kabhi jab hijr ki aahaT se dil angan men aati hai
bahut apna.iyat se bas vo apna yaad aata hai
tira hi aks utra hai miri nazmon men ghazlon men
vo lahja teri chahat ka vo chehra yaad aata hai
hamara naam likha tha kabhi jo ret par us ne
kabhi jab yaad aa.e to vo dariya yaad aata hai
mire angan men jab bhi shaam ke saa.e utarte hain
mujhe ‘shahin’ mohabbat ka hi saaya yaad aata hai
Leave a Reply