go shama huun pa mahfil-e-janan se duur huun
main andalib huun pa gulistan se duur huun
barg-e-khizan-rasida banaya hai ishq ne
main mausam-e-bahar men bustan se duur huun
ai yaar justuju men tiri surat-e-ghubar
sar-gashta huun pa gardish-e-dauran se duur huun
parvana-var go ki jalaya hai ishq ne
lekin charagh-e-gor-e-ghariban se duur huun
ghulta hai dil ki rah-rav-e-ulfat ke vaste
main khizr huun pa chashma-e-haivan se duur huun
kahta hai ye pukar ke khun-e-shahid-e-naz
qatil main tere gosha-e-daman se duur huun
banda huun ishq ka mira mazhab na puchhiye
azad ho ke gabru musalman se duur huun
mauj-e-nashim-e-subh satati hai kya mujhe
main bu-e-gul ki tarah gulistan se duur huun
kahta hai us ki zulf men phans kar ye murgh-e-dil
qaidi to huun ‘jamila’ pa zindan se duur huun
Leave a Reply