Hasrat Mohani
chahat miri chahat hi nahin aap ke nazdik
kuchh meri haqiqat hi nahin aap ke nazdik
kuchh qadr to karte mire izhar vafa ki
shayad ye mohabbat hi nahin aap ke nazdik
yuun ghair se bebak ishare sar-e-mahfil
kya ye miri zillat hi nahin aap ke nazdik
ushshaq pe kuchh had bhi muqarrar hai sitam ki
ya us ki nihayat hi nahin aap ke nazdik
agli si na raten hain na ghaten hain na baten
kya ab main vo ‘hasrat’ hi nahin aap ke nazdik
Leave a Reply