Anjum Khayali
hansi men Taal to deta huun aksar
magar main ḳhush nahin barbad ho kar
koi marta nahin zabt-e-fughan se
zara sa daagh paḌ jaata hai dil par
likhi hai reg-e-sahil par jo main ne
vo chiTThi paḌh nahin sakta samundar
jahan ham hain vahan sab da.ere hain
kisi ka koi markaz hai na mehvar
mujhe jaana hai vapas badalon men
nahin hona mujhe qatre se gauhar
mujhe kuchh der rukna chahiye tha
vo shayad dekh hi leta palaT kar
Leave a Reply