Hansi Mein Tal to Deta Hun Aksar

hañsī meñ Taal to detā huuñ aksar

magar maiñ ḳhush nahīñ barbād ho kar

koī martā nahīñ zabt-e-fuġhāñ se

zarā sā daaġh paḌ jaatā hai dil par

likhī hai reg-e-sāhil par jo maiñ ne

vo chiTThī paḌh nahīñ saktā samundar

jahāñ ham haiñ vahāñ sab dā.ere haiñ

kisī kā koī markaz hai na mehvar

mujhe jaanā hai vāpas bādaloñ meñ

nahīñ honā mujhe qatre se gauhar

mujhe kuchh der ruknā chāhiye thā

vo shāyad dekh hī letā palaT kar

Leave a Comment