jo tez-rau the thi pairon men jin ke jaan bahut
vo log oḌh ke so.e hain ab thakan bahut
daron men qaid kahin iḳhtilaf hote hain
makin ho ke bhi rahte hain be-makan bahut
na jaane shor uTha kar kahan se laa.i hai
hava ne aaj dikha.e hain mere kaan bahut
ye zindagi bhi ajab raah ki musafir hai
kahin chaḌhan bahut hai kahin Dhalan bahut
ye raaz roz koi faash kar hi deta hai
zamin ḳhud men sameTe hai asman bahut
zamin uThegi nahin asman jhukega nahin
ana-parast hain donon ke ḳhandan bahut
kisi ka dard sununga to TuuT ja.unga
mire liye hai faqat meri dastan bahut
Leave a Reply