pahchane tu har-dam vahi har aan vahi hai
janan vahi ai jaan vahi jaan vahi hai
asa.ish-e-tan rahat-e-jan taaza kiye ruuh
vallaho-ma.al-an-kama-kan vahi hai
ka.abe men vahi ḳhud hai vahi dair men hai aap
hindu kaho ya us ko musalman vahi hai
baḳhshe hai vahi ḳhaak ko din-o-dil-o-iman
gharat-gar-e-din-o-dil-o-iman vahi hai
parda hai ta.ayyun ka vahi ankhon ke aage
be-parda numa.inda-e-irfan vahi hai
ham yaad karen kis ko faramosh hon kis se
hai yaad bhi har-dam vahi nisyan vahi hai
sar tegh tale us ke to dhar dijiye kyunkar
qatil jo vahi hai to nigahban vahi hai
surat men hai zahir vahi ma.ani men hai batin
har shakl men paida vahi pinhan vahi hai
na maya-e-duniya hai na kuchh diin ka asbab
mujh be-sar-o-pa ka sar-o-saman vahi hai
dil hai so ghar us ka hai makan jan-o-tan us ka
yaan sahab-e-ḳhana vahi mehman vahi hai
be-dard vahi hai vahi hai dard va-lekin
apne to ‘muhib’ dard ka darman vahi hai
Leave a Reply