ek paikar yuun chamak uttha hai mere dhyan men
koi jugnu ud raha ho jis tarah tufan men
har bagula bastiyon ki samt lahrane laga
ashna chehre bhi ab aate nahin pahchan men
kya qayamat hai ki koi puchhne vaala nahin
zindagi tanha khadi hai hashr ke maidan men
vaqt padte hi hue ru-posh sab halqa-ba-gosh
ik yahi khubi to hai is daur ke insan men
aaine yadon ke main ne tod daale the magar
chand chehre phir ubhar aae mire vijdan men
log meri maut ke khvahan hain ‘afzal’ kis liye
chand ghazlon ke siva kuchh bhi nahin saman men
Leave a Reply