har ek din tha usi ka har ek raat us ki
mire badan men rahi muddaton hayat us ki
miri kitab men us ka bayan sach hi to hai
ki mere zehn pe chha.i hui hai zaat us ki
ajiib ḳhvab dikhaya hai raat ankhon ne
ki mere naam se mansub hai barat us ki
sisak sisak ke koi ro raha tha dil men mire
kisi ne jaise chura li ho ka.enat us ki
mujhe nasib hua zabt ka ḳhuda hona
ki mere hathon saja.i ga.i barat us ki
miri sada ka bhi koi na sunne vaala mila
vo chup thi aur sabhi sun rahe the baat us ki
Leave a Reply