Barha Yurish-E-Afkar Ne Sone Na Diya

bārhā yūrish-e-afkār ne sone na diyā

fikr āzād hai āzār ne sone na diyā

band thiiñ dā.era-e-ḳhvāb meñ āñkheñ apnī

fikr kī gardish-e-parkār ne sone na diyā

thī tasavvur meñ nihāñ-ḳhāna-e-dil kī tasvīr

rāt-bhar dīda-e-bedār ne sone na diyā

mujh se the bar-sar-e-paikār mire zehn-o-zamīr

mujh ko bedārī-e-kirdār ne sone na diyā

koī manzar thā ki thā manzar-e-rañgīñ kā fareb

kyā kahīñ ḳhvāb-e-pur-asrār ne sone na diyā

mujh pe is tarah se raushan thī haqīqat apnī

umr-bhar chashm-e-ḳhabar-dār ne sone na diyā

maiñ ne kuchh dhuup meñ jalte hue chehre dekhe

phir mujhe sāya-e-dīvār ne sone na diyā

rāt-bhar bārish-e-ilhām rahī hai dil par

sub.h tak abr-guhar-bār ne sone na diyā

‘lais’ mauzū-e-suḳhan fikr-e-bashar thī ham the

aur phir garmī-e-guftār ne sone na diyā

Leave a Comment