barha yurish-e-afkar ne sone na diya
fikr azad hai azar ne sone na diya
band thiin da.era-e-ḳhvab men ankhen apni
fikr ki gardish-e-parkar ne sone na diya
thi tasavvur men nihan-ḳhana-e-dil ki tasvir
rat-bhar dida-e-bedar ne sone na diya
mujh se the bar-sar-e-paikar mire zehn-o-zamir
mujh ko bedari-e-kirdar ne sone na diya
koi manzar tha ki tha manzar-e-rangin ka fareb
kya kahin ḳhvab-e-pur-asrar ne sone na diya
mujh pe is tarah se raushan thi haqiqat apni
umr-bhar chashm-e-ḳhabar-dar ne sone na diya
main ne kuchh dhuup men jalte hue chehre dekhe
phir mujhe saya-e-divar ne sone na diya
rat-bhar barish-e-ilham rahi hai dil par
sub.h tak abr-guhar-bar ne sone na diya
‘lais’ mauzu-e-suḳhan fikr-e-bashar thi ham the
aur phir garmi-e-guftar ne sone na diya
Leave a Reply