jab munDeron pe parindon ki kumak jaari thi
lafz the lafzon men ehsas ki sardari thi
ab jo lauTa huun to pahchan nahin hoti hai
kahan divar thi divar men almari thi
vo haveli bhi saheli thi paheli jaisi
jis ki inTon men mire ḳhvab the ḳhuddari thi
aḳhiri baar main kab us se mila yaad nahin
bas yahi yaad hai ik shaam bahut bhari thi
puchhta phirta huun galiyon men koi hai koi hai
ye vo galiyan hain jahan log the sarshari thi
peḌ the chand makanon men zamanon jaise
jin ki chhanv men miri ruuh ki lu jaari thi
kya bhale din the hamen khel tha hansna rona
saans lena bhi hamen jaise adakari thi
bas koi ḳhvab tha aur ḳhvab ke pas-manzar men
baagh tha phuul the ḳhushbu ki numudari thi
ham ne dekha tha use ujle dinon men ‘hammad’
jin dinon niind thi aur niind men bedari thi
Leave a Reply