raat ke pichhle pahar ik sansanahaT si hui
aur phir ek aur phir ek aur aahaT si hui
daf.atan zanjir khanki yak-ba-yak paT khul ga.e
sham.a ki lau men achanak thartharahaT si hui
ḳhasta-e-divar-o-dar yak-bargi hilne lage
taaq thi viran lekin jagmagahaT si hui
ek paikar sa dhuen ke biich lahrane laga
nim-va honTon pe raqsan muskurahaT si hui
phir bhayanak raat phir pur-haul sannaTa ‘zubair’
phir khanDar men shahparon ki phaḌphaḌahaT si hui
Leave a Reply